Өрт сөндіру көлігі

Өрт сөндіру көлігі – өрт шыққан жерлерге өрт сөндіруші адамдар мен оны сөндіруге арналған құрал-жабдықтарды жеткізетін әмбебап үлкен көлік. Өрт сөндіру көлігі «негізгі», «арнайы» және «көмекші» болып үш түрге бөлінеді. Негізгі өрт сөндіру көлігі өрт ошағына шашылатын өрт сөндіргіш заттары (газды су, көбіктенген ауа, ұнтақ) бар автоцистернасымен бірге өрт сөндірушілерді де алып барады. Ол қол және автосорғылар мен, сорғы стансаларымен жабдықталған. Арнайы өрт сөндіру көлігі өрт шыққан жерге өрт сөндірушілерді, бөлме ішінен түтін соратын және оған таза ауа жіберетін, үйді бұзатын не тесетін, жөндейтін және тағы басқа өрт сөндіруге арналған құрал-жабдықтарды (өрт сөндіру сатысы, ілгекті бақан, балта, металл кесуге арналған аспаптар, прожекторлық жарықтандыру, желдеткіш, дем алу аппараттары) тасиды. Көмекші өрт сөндіру көлігі өрт сөндіру техникасының жұмысына көмектеседі, яғни жанармай құяды, жөндейді, техникалық қызмет көрсетеді.
Өрт сөндіру көліктерін өзге көлік түрлерінен оңай ажырату үшін қызыл түске бояйды. Өрт сөндіру көліктерінде көк сәулелі шам мен дабыл болады.